अन्न सुरक्षा आणि मानके अधिनियम २००६
कलम ४६ :
अन्न (खाद्य) विश्लेषकाची कार्ये :
१) अन्न (खाद्य) पदार्थाच्या नमुन्याचे पाकिट अन्न (खाद्य) सुरक्षा अधिकाऱ्याकडून किंवा इतर कोणत्याही व्यक्तीकडून विश्लेषणाकरिता मिळाल्यावर, अन्न (खाद्य) विश्लेषक खोक्यावरील किंवा त्याच्या बाह्य आवरणावरील असलेली मोहर वेगळ्या प्राप्त झालेल्या नमुन्याच्या ठश्याबरोबर (सील) जूळवून पाहील आणि मोहोरच्या स्थितीचे वर्णन नमूद करील :
परंतु असे की, ज्याबाबतीत अन्न (खाद्य) सुरक्षा अधिकाऱ्याकडून मिळालेला नमुना तुटलेल्या अवस्थेत आढळला किंवा विश्लेषणास योग्य नसला तर नमुना मिळाल्याच्या तारखेपासून सात दिवसांच्या आत याची माहिती निर्देशित अधिकाऱ्याला देईल व नमुन्याच्या दुसऱ्या भागाची मागणी करील.
२) अन्न (खाद्य) विश्लेषक, अन्न (खाद्य) सुरक्षा अधिकारी किंवा या अधिनियमा अंतर्गत प्राधिकृत केलेल्या इतर कोणत्याही व्यक्तीने त्याला पाठविलल्या अन्न (खाद्य) पदार्थाच्या नमुन्यांचे विश्लेषण करवील.
३) अन्न (खाद्य) विश्लेषक, अन्नाचा (खाद्याचा) कोणताही नमुना प्राप्त झाल्यापासून चौदा दिवसांच्या आत,-
एक) जिथे असा नमुना कलम ३८ किंवा कलम ४७ अन्वये प्राप्त झाला असेल तर अहवालाच्या चार प्रती, ज्यात नमुना घेण्याच्या पद्धतीचे व विश्लेषणाचे विवरन असेल, निर्देशित अधिकाऱ्याला पाठविल; आणि
दोन) जिथे असा नमुना कलम ४० अन्वये प्राप्त झाला असेल तर ज्या खरेदीदाराने खरेदी केलेला अन्न (खाद्य) पदार्थ विश्लेषणास पाठविलेला असेल त्यास अहवालाची एक प्रत व एक प्रत निर्देशित अधिकाऱ्यास, ज्यात नमुना घेण्याची पद्धत व विश्लेषणाचे विवरण असेल, पाठविल :
परंतु जे नमुने प्राप्त झाल्यापासून चौदा दिवसांच्या आत विश्लेषित झाले नसेल त्या नमुन्याबाबत अन्न (खाद्य) विश्लेषक निर्देशित अधिकाऱ्यास व अन्न (खाद्य) सुरक्षा आयुक्तास याची सकारण माहिती देईल व विश्लेषणासाठी निर्धारित वेळेबाबत माहिती देईल.
४) अन्न (खाद्य) विश्लेषकाच्या अहवालाबाबतचे अपील निर्देशित अधिकाऱ्यासमोर केले जाईल, आणि तो असे सुनिश्चित करेल की, ही बाब अन्न (खाद्य) प्राधिकरणाने अधिसूचित केलेल्या संदर्भ अन्न (खाद्य) प्रयोगशाळेत त्यांचे अभिप्रायासाठी निर्देशित करील.
