भारतीय दंड संहिता १८६०
प्रकरण ७ :
भूसेना, १.(नौसेना आणि वायूसेना) यासंबंधीच्या अपराधाविषयी :
कलम १३१ :
लष्करी बंडास अपप्रेरणा (चिथावणी) देणे, अथवा भूसैनिक, नौसैनिक किंवा वायुसैनिक यांना त्यांच्या कर्तव्यापासून विचलित करण्याचा प्रयत्न करणे :
(See section 159 of BNS 2023)
अपराधाचे वर्गीकरण :
अपराध : लष्करी बंडास अपप्रेरणा देणे, अथवा अधिकारी, भूसैनिक, नौसैनिक किंवा वायुसैनिक याला त्याच्या निष्ठेपासून किंवा कर्तव्यापासून विचलित करण्याचचा प्रयत्न करणे.
शिक्षा :आजीवन कारावास किंवा १० वर्षांचा करावास व द्रव्यदंड.
दखलपात्र / अदखलपात्र :दखलपात्र
जामीनपात्र / अजामीनपात्र :अजामीनपात्र
शमनीय / अशमनीय : अशमनीय.
कोणत्या नायालयात विचारणीय :सत्र न्यायालय
————
जो कोणी २.(भारत सरकारच्या) भूसेनेतील, १.(नौसेनेतील किंवा वायुसेनेतील) अधिकाऱ्याला -भूसैनिकाला, १.(नौसैनिकाला किंवा वायुसैनिकाला) बंड करण्यास अपप्रेरणा (चिथावणी) देईल अथवा अशा कोणत्याही अधिकाऱ्याला, भूसैनिकाला, १.(नौसैनिकाला किंवा वायुसैनिकाला) त्यांच्या निष्ठेपासून किंवा त्याच्या कर्तव्यापासून विचलित करण्याचा प्रयत्न करील त्याला, ३.(आजन्म कारावासाची) किंवा दहा वर्षेपर्यंत असू शकेल इतक्या मुदतीची कोणत्यातरी एका वर्णनाच्या कारावासाची शिक्षा होईल आणि तो द्रव्यदंडासही पात्र होईल.
स्पष्टीकरण :
या कलमामध्ये अधिकारी १.(भूसैनिक, ५.(नौसैनिक) आणि वायुसैनिक) या शब्दांमध्ये, प्रकरणापरत्वे, ६.(भूसेना अधिनियम), ७.(भूसेना अधिनियम १९५० (१९५० चा ४६)), ५.(नौसेना अनुशासन अधिनियम), ८.(***) ९.(भारतीय नौसेना अनुशासन अधिनियम, १९३४ (१९३४ चा ३४) आता नौसेना अधिनियम १९५७ (१९५७ चा ६२) ) १०.(***) ११.(वायुसेना अधिनियम किंवा १२.(वायुसेना अधिनियम, १९५० (१९५० चा ४५ ))) यांस अधीन असलेल्या कोणत्याही व्यक्तीचा समावेश होतो.
———
१. १९२७ चा अधिनियम सं० १० कलम २ आणि अनुसूची १ द्वारा समाविष्ट करण्यात आले.
२. अनुकूलन आदेश १९५० द्वारा क्वीन याऐवजी दाखल करण्यात आले.
३. १९५५ चा अधिनियम २६ – कलम ११७ व अनुसूची यांद्वारे जन्मठेप काळे पाणी याऐवजी दाखल करण्यात आले.
४. १८७० चा अधिनियम २७ -कलम ६ द्वारे समाविष्ट केले.
५. १९३४ चा अधिनियम ३५ – कलम २ व अनुसूची द्वारे समाविष्ट केले.
६. १९२७ चा अधिनियम १० – कलम २ व अनुसूची १ यांद्वारे हर मॅजेस्टीच्या भूसेनेचे अधिक चांगले नियमन करण्यासाठी असलेली युद्ध नियमावली किंवा १८६९ चा अधिनियम क्रमांक ५ यामध्ये अंतर्भूत असलेली युद्ध नियमावली याऐवजी दाखल केले.
७. १९५१ चा अधिनियम ३ – कलम ३ व अनुसूची यांद्वारे भारतीय भूसेना अधिनियम १९११ याऐवजी दाखल केले.
८. अनुकूलन आदेश १९५० द्वारे किंवा हा शब्द वगळण्यात आला.
९. आता नौसेना अधिनियम १९५७ (१९५७ चा ६२) पहा.
१०. अनुकूलन आदेश १९५० द्वारे याद्वारे विशोधित केलेला तो अधिनियम हा मजकूर वगळण्यात आला.
११. १९३२ चा अधिनियम १४ – कलम १३० व अनुसूची यांद्वारे किंवा वायुसेना अधिनियम याऐवजी समाविष्ट केले.
१२. १९५१ चा अधिनियम ३ – कलम ३ व अनुसूची यांद्वारे भारतीय वायुसेना अधिनियम १९३२ याऐवजी समाविष्ट केले.
