भारतीय दंड संहिता १८६०
कलम ३०७ :
खुनाचा प्रयत्न करणे:
(See section 109 of BNS 2023)
अपराधाचे वर्गीकरण :
अपराध : खुनाचा प्रयत्न करणे.
शिक्षा :१० वर्षाचा कारावास व द्रव्यदंड.
दखलपात्र / अदखलपात्र :दखलपात्र.
जामीनपात्र / अजामीनपात्र :अजामीनपात्र
शमनीय / अशमनीय : अशमनीय
कोणत्या नायालयात विचारणीय :सत्र न्यायालय.
——-
अपराध : अशा कृतीमुळे कोणत्याही व्यक्तीला दुखापत झाल्यास.
शिक्षा :आजीवन कारावास किंवा १० वर्षाचा कारावास व द्रव्यदंड.
दखलपात्र / अदखलपात्र :दखलपात्र.
जामीनपात्र / अजामीनपात्र :अजामीनपात्र
शमनीय / अशमनीय : अशमनीय
कोणत्या नायालयात विचारणीय :सत्र न्यायालय.
——–
अपराध : जन्मठेप-कैद्याने खुनाचचा प्रयत्न करणे-दुखापत झाल्यास.
शिक्षा :मृत्यू किंवा १० वर्षाचा कारावास व द्रव्यदंड.
दखलपात्र / अदखलपात्र :दखलपात्र.
जामीनपात्र / अजामीनपात्र :अजामीनपात्र
शमनीय / अशमनीय : अशमनीय
कोणत्या नायालयात विचारणीय :सत्र न्यायालय.
——-
ज्या उद्देशाने किंवा जाणिवेने आणि ज्या परिस्थितीत कोणी एखादी कृती केली असता मृत्यू घडून आला तर तो दोषी ठरेल तशा उद्देशाने किंवा जाणिवेने तशा परिस्थितीत, जो कोणी ती कृती करील त्याला दहा वर्षेपर्यत असू शकेल इत्यक्या मुदतीची कोणत्यातरी एका वर्णनाच्या कारावासाची शिक्षा होईल, व तो द्रव्यदंडासही पात्र होईल आणि जर अशा कृतीमुळे कोणत्याही व्यक्तीला दुखापत झाली तर, त्याला १.(आजन्म कारावासाची) अगर वर उल्लेखिलेल्या (म्हटलेल्या) कारावासाच्या शिक्षेस पात्र होईल.
जन्मठेप कैद्यांनी सिद्द केलेले प्रयत्न :
२.(या कलमाखाली अपराध करणारी एखादी व्यक्ती जर १.(आजन्म कारावास) भोगत असेल तर त्या प्रकरणी, जर दुखापत घडून आली तर त्या व्यक्तीला मृत्यूची शिक्षा होऊ शकेल.)
उदाहरणे :
क) (क) हा (य) ला ठार मारण्याच्या उद्देशाने त्याच्यावर अशा परिस्थितीत गोळी झाडतो की, जर त्यामुळे मृत्यू घडून आला तर (क) खुनाबद्दल दोषी होऊ शकेल. (क) या कलमाखालील शिक्षेस पात्र आहे.
ख) कोवळ्या वयाच्या बालकाचा मृत्यु घडवून आणण्याच्या उद्देशाने (क) त्याला एका निर्जन ठिकाणी उघड्यावर टाकतो. त्यामुळे बालकाचा मृत्यु घडून आला नाही तरी, या कलमाद्वारे व्याख्या करण्यात आलेला अपराध (क) ने केला आहे.
ग) (य) चा खून करण्याच्या उद्देशाने (क) एक बंदूक खरेदी करतो व तीत बार भरतो. (क) ने अद्याप अपराधध केलेला नाही. (क) हा (य) वर बंदूक झाडतो. या कलमात व्याख्या करण्यात आलेला अपराध त्याने केलेला आहे, आणि जर अशा गोळीबारात त्याने (य) ला जखमी केले तर या कलमाच्या ३.(पहिल्या परिच्छेदाच्या) नंतरच्या भागाद्वारे उपबंधित केलेल्या शिक्षेस तो पात्र आहे.
घ) (क) हा (य) ला विष देऊन त्याचा खून करण्याच्या उद्देशाने विष खरेदी करुन ते अन्नात मिसळतो. ते अन्न (क) कडे राहते. याकलमामध्ये व्याख्या करण्यात आलेला अपराध (क) ने अद्याप केलेला नाही. (क) ते अन्न (य) च्या टेबलावर ठेवतो किंवा (य) च्या टेबलावर ठेवण्यासाठी (य) च्या नोकराच्या स्वाधीन करतो. या कलमामध्ये व्याख्या करण्यात आलेला अपराध (क) ने केलेला आहे.
——-
१. १९५५ चा अधिनियम – २६ कलम ११७ व अनुसूची यांद्वारे जन्मठेप काळे पाणी याऐवजी समाविष्ट करण्यात आले.
२. १८७० चा अधिनियम २७ – कलम ११ द्वारे जादा दाखल केले.
३. १८९१ चा अधिनियम १२ – कलम २ व अनुसूची दोन यांद्वारे समाविष्ट करण्यात आले.
