भारतीय न्याय संहिता २०२३
कलम ३३८ :
मूल्यवान रोखा, मृत्युपत्र इ. चे बनावटीकरण :
कलम : ३३८
अपराधाचे वर्गीकरण :
अपराध : मूल्यवान रोखा, मृत्यूपत्र अथवा कोणताही मूल्यवान रोखा तयार करण्यासाठी हस्तांतरित करण्यासाठी किंवा कोणतेही पैसे, इत्यादी घेण्यासाठी द्यावयाचे प्राधिकारपत्र यांचे बनावटीकरण.
शिक्षा : आजीवन कारावास किंवा १० वर्षाचा कारावास व द्रव्यदंड.
दखलपात्र / अदखलपात्र : अदखलपात्र.
जामीनपात्र / अजामीनपात्र : अजामीनपात्र.
शमनीय / अशमनीय : अशमनीय
कोणत्या नायालयात विचारणीय : प्रथम वर्ग दंडाधिकारी.
———
अपराध : मूल्यवान रोखा हा केन्द्र शासनाची वचनचिट्ठी असल्यास.
शिक्षा : आजीवन कारावास किंवा १० वर्षाचा कारावास व द्रव्यदंड.
दखलपात्र / अदखलपात्र : दखलपात्र.
जामीनपात्र / अजामीनपात्र : अजामीनपात्र.
शमनीय / अशमनीय : अशमनीय
कोणत्या नायालयात विचारणीय : प्रथम वर्ग दंडाधिकारी.
———
जो दस्तऐवज म्हणजे एखादा मूल्यवान रोखा, किंवा एखादे मृत्युपत्र, किंवा मुलगा दत्तक घेण्याविषयीचे एखादे प्राधिकारपत्र असल्याचे दिसते, अथवा एखादा मूल्यवान रोखा बनवण्याचा, किंवा हस्तांतरित करण्याचा, अगर मुद्दल, त्यावरील व्याज किंवा लाभांश घेण्याचा, अगर कोणतीही रक्कम, जंगम मालमत्ता किंवा मूल्यवान रोखा स्वीकारण्याचा किंवा सुपूर्त करण्याचा प्राधिकार कोणत्याही व्यक्तीला देत असल्याचे दिसते, असा एखादा दस्तऐवज, अथवा जो दस्तऐवज म्हणजे पैसे चुकते झाल्याची पोच देणारे निस्तारपत्र किंवा पावती अगर कोणतीही जंगम मालमत्ता किंवा मूल्यवान रोखा सुपूर्त करण्यात आल्याबद्दलचे निस्तारपत्र किंवा पावती असल्याचे दिसते असा कोणताही दस्तऐवज जो कोणी बनावट तयार करील त्याला आजन्म कारावासाची, किंवा दहा वर्षांपर्यंत असू शकेल इतक्या मुदतीची कोणत्या तरी एका वर्णनाच्या कारावासाची शिक्षा होईल व तो द्रव्यदंडासही पात्र होईल.
