भारतीय दंड संहिता १८६०
प्रकरण २० :
विवाहासंबंधीच्या अपराधांविषयी :
कलम ४९३ :
एखाद्या पुरुषाने कायदेशीर विवाह झाल्याचा समज लबाडीने निर्माण करुन दांपत्यभावाने सहवास घडवून आणणे :
(See section 81 of BNS 2023)
अपराधाचे वर्गीकरण :
अपराध : एखाद्या पुरुषाने, त्याच्याशी कायदेशीरपणे विवाहबद्ध न झालेल्या स्त्रीचा, ती त्याच्याशी कायदेशीरपणे विवाहबद्ध झाली आहे असा लबाडीने समज करुन देऊन त्या समजुतीने तिला आपल्याबरोबर दांपत्यभावाने राहण्यास भाग पाडणे.
शिक्षा :१० वर्षाचा कारावास व द्रव्यदंड.
दखलपात्र / अदखलपात्र :अदखलपात्र.
जामीनपात्र / अजामीनपात्र :अजामीनपात्र
शमनीय / अशमनीय : अशमनीय
कोणत्या नायालयात विचारणीय :प्रथम वर्ग दंडाधिकारी.
——–
जी स्त्री आपल्याशी कायदेशीरपणे विवाहबद्ध झालेली नाही तिचा, आपल्याशी ती कायदेशीरपणे विवाहबद्ध झालेली आहे, असा लबाडीने समज करुन देऊन, तशा समजुतीत तिला आपल्याबरोबर दांपत्यभावाने राहण्यास किंवा लैंगिक संभोग करण्यास जो पुरुष भाग पाडतो, त्या प्रत्येक पुरुषाला दहा वर्षेपर्यंत असू शकेल इतक्या मुदतीची कोणत्या तरी एका वर्णनाच्या कारावासाची शिक्षा होईल व तो द्रव्यदंडासही पात्र होईल.
