भारतीय दंड संहिता १८६०
कलम ३६४ :
खून करण्यासाठी अपनयन करणे किंवा अपहरण करणे :
(See section 140 of BNS 2023)
अपराधाचे वर्गीकरण :
अपराध : खून करण्यासाठी अपनयन करणे किंवा अपहरण करणे.
शिक्षा :आजीवन कारावास किंवा १० वर्षाचा सश्रम कारावास व द्रव्यदंड.
दखलपात्र / अदखलपात्र :दखलपात्र
जामीनपात्र / अजामीनपात्र :अजामीनपात्र
शमनीय / अशमनीय : अशमनीय
कोणत्या नायालयात विचारणीय :सत्र न्यायालय.
——–
एखाद्या व्यक्तीचा खून करता यावा किंवा खून होण्याच्या संकटात ती व्यक्ती सापडेल अशा प्रकारे तिची वासलात लावता यावी म्हणून जो कोणी अशा व्यक्तीचे अपनयन किंवा अपहरण करील त्याला, १.(आजीवन कारावासाची) किंवा दहा वर्षेपर्यन्त असू शकेल इतक्या मुदतीची सश्रम (कठोर) कारावासाची शिक्षा होईल व तो द्रव्यदंडासही पात्र होईल.
उदाहरणे :
क) (य) ला एका मूर्तीसमोर बळी देण्याच्या उद्देशाने किंवा तसे होण्याचा संभव असल्याची जाणीव असताना (क) हा (य) २.(भारतातून) अपनयन करतो. (क) ने या कलमामध्ये व्याख्या करण्यात आलेला अपराध केला आहे.
ख) (ख) चा खून करता यावा म्हणून (क) हा (ख) ला बळजबरीने त्याच्या घरापासून दूर घेऊन जातो किंवा त्याला भूरळ पाडून नेतो. (क) ने या कलमामध्ये व्याख्या करण्यात आलेला अपराध केला आहे.
——–
१. १९५५ चा अधिनियम २६ – कलम ११७ व अनुसूची यांद्वारे जन्मठेप काळे पाणी याऐवजी समाविष्ट करण्यात आले.
२. क्रमश: अनुकूलन आदेश १९४८, अनुकूलन आदेश १९५० आणि १९५१ चा अधिनियम ३ – कलम ३ व अनुसूची याद्वारे ब्रिटिश इंडिया याऐवजी समाविष्ट करण्यात आले.
