गुंगीकारक औषधी द्रव्ये व मनोव्यापारांवर परिणाम करणारे पदार्थ अधिनियम १९८५
कलम २० :
कॅनाबिस वनस्पती व कॅनॅबिस यांच्या बाबत उल्लंघनाबद्दल शिक्षा :
जी कोणी व्यक्ती, या अधिनियमाच्या तरतुदीचे किंवा त्याअन्वये करण्यात आलेल्या कोणत्याही नियमाचे किंवा आदेशाचे त्याअन्वये देण्यात आलेल्या कोणत्याही अनुज्ञप्तीच्या कोणत्याही शर्तीचे उल्लंघन करून-
अ) कोणत्याही कॅनॅबिस वनस्पतीची लागवड करील; किंवा
ब) कॅनॅबिसचे उत्पादन करील, निर्मिती करील, ताबा मिळवील, विक्री खरेदी, वाहतूक करील, राज्याराज्यात आयात-निर्यात, किंवा वापर करील; अशा बाबतीत जर-
१.(एक) असे उल्लंघन खंड (अ) बाबत असेल तर, दहा वर्षापर्यंतच्या सक्त मजूरीच्या कैदेची आणि एक लाख रूपयेपर्यंतच्या दंडाच्या शिक्षेस पात्र ठरेल, आणि
दोन) असे उल्लंघन खंड (ब) बाबत असेल तर-
अ) अल्प मात्राच्या उल्लंघनाकरिता, २.(एक वर्षपर्यंत) सक्त मजूरीच्या कैदेस किंवा दहा हजार रूपये पर्यंत दंड किंवा दोन्ही शिक्षांकरिता पात्र ठरेल.
ब) व्यापारी मात्रा पेक्षा कमी परंतू अल्पमात्रा जास्त मात्राच्या उल्लंघनाकरिता दहा वर्षापर्यंतच्या सक्त मजूरीच्या कैदेस आणि एक लाख रूपये पर्यंत दंडाच्या शिक्षेस पात्र ठरेल.
क)व्यापारी मात्राच्या उल्लंघनाकरिता, दहा वर्षापेक्षा कमी असणार नाही परंतु विस वर्षापर्यंतच्या सक्त मजुरीच्या कैदेस आणि एक लाख रूपयाहून कमी नसेल इतक्या परंतु रूपये दोन लाख पर्यंत वाढविता येईल इतक्या रकमेच्या दंडासही पात्र ठरेल. तथापी न्यायालयाला न्यायनिर्णयात कारण नमूद करून दंडाची रक्कम दोन लाख रूपयांपेक्षाही वाढविता येईल. )
——–
१. २००१ चा अधिनियम क्रमांक ९ याच्या कलम ७ अन्वये मूळ मजकुराऐवजी समाविष्ट करण्यात आले.
२. २०१४ चा अधिनियम क्रमांक १६ याच्या कलम ९ अन्वये सहा महीन्यापर्यंत याऐवजी समाविष्ट करण्यात आले.
