गुंगीकारक औषधी द्रव्ये व मनोव्यापारांवर परिणाम करणारे पदार्थ अधिनियम १९८५
कलम ५३ :
विशिष्ट विभागांच्या अधिकाऱ्यांकडे पोलिस ठाण्याच्या प्रभारी अधिकाऱ्याचे अधिकार सोपविणे :
१) केंद्रशासनाला राज्य शासनाशी विचारविनिमय करून शासकीय राजपत्रात अधिसूचना प्रसिद्ध करून उत्पादनशुल्क, गुंगीकारके, सीमाशुल्के, महसूल गुप्तवर्ता विभाग यांपैकी कोणत्याही विभागाच्या किंवा सीमासुरक्षा दलाच्या कोणत्याही अधिकाऱ्याकडे १.(किंवा निमलष्करी बल किंवा सशस्त्र बलासह केंद्र सरकारच्या इतर कोणत्याही विभागाकडे) किंवा अशा अधिकाऱ्यांच्या कोणत्याही वर्गाकडे या अधिनियमाखालील अपराधांच्या तपासणीसाठी पोलिसठाण्याच्या प्रभारी अधिकाऱ्याचे अधिकार सोपवता येतील.
२) राज्य शासनाला शासकीय राजपत्रात अधिसूचना प्रसिद्ध करून औषधनियंत्रण, महसूल किंवा उत्पादनशुल्क विभागाच्या कोणत्याही अधिकाऱ्याकडे २.(किंवा इतर कोणत्याही विभागाकडे) किंवा अशा अधिकाऱ्यांच्या कोणत्याही वर्गाकडे या अधिनियमाखालील अपराधाच्या चौकशीसाठी पोलिसठाण्याच्या प्रभारी अधिकाऱ्याचे अधिकार सोपवता येतील.
———
१. २००१ चा अधिनियम क्रमांक ९ याच्या कलम २४ अन्वये मूळ मजकुराऐवजी समाविष्ट करण्यात आले
२. २००१ चा अधिनियम क्रमांक ९ याच्या कलम २४ अन्वये समाविष्ट करण्यात आले.