भारतीय दंड संहिता १८६०
कलम ३५३:
लोकसेवकाला त्याचे कर्तव्य पार पाडण्यापासून धाकाने परावृत्त करण्यासाठी हमला किंवा फौजदारीपात्र बलप्रयोग करणे :
(See section 132 of BNS 2023)
अपराधाचे वर्गीकरण :
अपराध : लोकसेवकाला त्याचे कर्तव्य पार पाडण्यापासून धाकाने परावृत्त करण्यासाठी हमला किंवा फौजदारीपात्र बलप्रयोग करणे.
शिक्षा : १.(२ वर्षाचा कारावास किंवा द्रव्यदंड किंवा दोन्ही).
दखलपात्र / अदखलपात्र :दखलपात्र
जामीनपात्र / अजामीनपात्र : १.(जामीनपात्र)
शमनीय / अशमनीय : अशमनीय
कोणत्या नायालयात विचारणीय :१.(कोणताही दंडाधिकारी.)
——-
लोकसेवक असेलेली कोणतीही व्यक्ती असा लोकसेवक म्हणून आपले कर्तव्य बजावत असताना अथवा असा लोकसेवक म्हणून आपले कर्तव्य पार पाडण्यास त्या व्यक्तीला प्रतिबंध करण्याच्या किंवा त्यापासून धाकाने परावृत्त करण्याच्या उद्देशाने अथवा असा लोकसेवक म्हणून आपले कर्तव्य कायदेशीरपणे पार पाडीत असताना अशा व्यक्तीने केलेल्या किंवा करण्याचा प्रयत्न केलेल्या कोणत्याही गोष्टीच्या परिणामी, जो कोणी तिच्यावर हमला किंवा फौजदारीपात्र बलप्रयोग करील, त्याला १.(दोन वर्षेपर्यंत) असू शकेल इतक्या मुदतीची कोणत्यातरी एका वर्णनाच्या कारावासाची किंवा द्रव्यदंडाची किंवा दोन्ही शिक्षा होतील.
——–
१.महाराष्ट्र २०२२ चे विधेयक क्रमांक २, २८ जुलै २०२३ याच्या कलम २ व ३ प्रमाणे सुधारीत, या अगोदर भारतीय दंड संहिता आणि फौजदारी प्रक्रिया संहिता (महाराष्ट्र सुधारणा) अधिनियम २०१७ (२०१८ चा ४०) च्या प्रकरण २, कलम ३ आणि प्रकरण ३ कलम ५ (दोन) नुसार सुधारणा केली होती
२. फौजदारी प्रक्रिया संहिता (सुधारणा) अधिनियम २००५ (२००५ चा २५) क्र. ४२ द्वारे घातला. (२३-०६-२००६ पासून)