पर्यावरण (संरक्षण) अधिनियम १९८६
कलम १७ :
प्रशासकीय विभागांनी केलेला अपराध :
(१) या अधिनियमाखालील अपराध शासनाच्या कोणत्याही विभागाने केलेला असेल तेव्हा विभागप्रमुख हा त्या अपराधाबद्दल दोषी असल्याचे मानण्यात येईल आणि त्याच्याविरूद्ध कार्यवाही केली जाण्यास आणि त्यानुसार शिक्षा दिली जाण्यास तो पात्र होईल :
परंतु, जर विभागप्रमुखाने, अपराध आपल्या नकळत घडला किंवा असा अपराध घडू नये यासाठी आपण सर्वप्रकारे यथायोग्य तत्परता दाखविली होती असे शाबीत केले तर, तो कोणत्याही शिक्षेस पात्र ठरणार नाही.
(२) पोटकलम (१) मध्ये काहीही अंतर्भूत असेल तरी, या अधिनियमाखालील अपराध शासनाच्या एखाद्या विभागाने केलेला असेल आणि विभागप्रमुखाव्यतिरिक्त इतर कोणत्याही अधिकाऱ्याच्या संमतीने किंवा मूकानुमतीने तो अपराध करण्यात आला होता किंवा त्याने केलेल्या हलगर्जीपणाशी त्याचा कारणसंबंध जोडता येण्यासारखा आहे, असे शाबीत करण्यात आले तर, असा अधिकारीही त्या अपराधाबद्दल दोषी असल्याचे मानण्यात येईल आणि त्याच्याविरूद्ध कार्यवाही केली जाण्यास आणि त्यानुसार शिक्षा दिली जाण्यास तो पात्र होईल.
